Ачылыш аземине Кыргыз Республикасынын Министрлер Кабинетинин Төрагасы – Президенттин Администрациясынын Жетекчиси Адылбек Касымалиев, Ош шаарынын мэри Жанарбек Акаев жана Кыргыз Республикасынын Президентинин Ош облусундагы ыйгарым укуктуу өкүлү Аманкан Кенжебаев, Ош шаардык Кеңешинин төрагасы Болотбек Баетов катышып, мектепте түзүлгөн шарттар менен таанышып чыгышты.

Адылбек Касымалиев шаар тургундарын Кыргыз Республикасынын Президенти Садыр Жапаровдун жана жеке өзүнүн атынан жаңы мектептин ачылышы менен куттуктады.

Ал өз сөзүндө үстүбүздөгү жылдын 10-апрелинде мамлекет башчысы Ош шаарындагы 10 орто мектептин курулушуна расмий старт бергенин, алардын бири Салижан Жигитов атындагы мектеп бүгүн пайдаланууга берилип жатканын белгиледи.

Жаңы мектеп 1200 окуучуга ылайыкталган. Ал эми эки сменде иштеген учурда 2500гө чейин окуучуну кабыл алууга мүмкүнчүлүгү бар. Курулуш иштерине Турукташтыруу фондунан дээрлик 1 млрд сомго жакын каражат бөлүнгөн.

Төрт кабаттуу, беш блоктон турган заманбап билим берүү мекемесинде окуу аудиториялары, китепкана, ашкана каралган. Ошондой эле окуучулардын спорт менен машыгуусу үчүн футбол, волейбол жана баскетбол аянтчалары курулган.

Белгилей кетсек, мектепке кыргыз элинин көрүнүктүү уулу, белгилүү адабиятчы, акын жана коомдук ишмер Салижан Жигитовдун ысымы ыйгарылган. Бүгүнкү күндө Ош шаарындагы 70 мектепте 100 миңден ашуун окуучу билим алат. Жаңы мектептердин курулушу шаардагы окуучулар үчүн орун тартыштыгын азайтууга, билим берүү инфраструктурасын кеңейтүүгө жана балдарга заманбап шарттарды түзүүгө багытталган.