Социалдык тармактарда “Кыргыз Республикасынын Жогорку Кеңешинин депутаттарын шайлоо өнөктүгүнө Ош шаарынын мэриясынын түзүмдүк жана аймактык бөлүмдөрүнүн кызматчылары катышып жатат”, – деп тараган маалыматтын негизинде, кызматтык териштирүү жүргүзүлүп, комиссиянын чечими менен “Сулайман-Тоо” муниципалдык аймактык башкармалыгынын башчысынын орун басары кызматынан четтетилди.

Ал эми “Ош шаар суу канал” ишканасынын жетекчиси Кокочоров Доолатбек Курманбековичке, Ош шаардык маданият башкармалыгынын башчысы Кадыркулов Элдияр Тажибаевичке, Ош шаарынын мэриясынын муниципалдык менчик башчысы Имарова Канышай Камботоевнага эскертүү берилип, “Ош шаар суу канал” ишканасынын жетекчисинин орун басары Байкишиев Талант Осмоналиевичти жана Ош шаардык муниципалдык менчик башкармалыгынын кызматкери Камил Камчы уулун кызматтан бошотуу сунушу жетекчилигине жиберилди.

Ошондой эле, териштирүү учурунда шайлоо өнөктүгүнө аралашты делинген Ош шаардык маданият башкармалыгынын башчысынын орун басары Улан Эгембердиев, “Ош жылуулук камсыздоо” ишканасынын төмөнкү кызматкерлери Алтынбул Жунусов, Кабылжан Абдибаитов, Раджи Жээналиев, Айзирек Атажанова, Сухраб Сайдуллаев, Ашимжан уулу Нооруздар ушул күнгө карата аталган ишканада иштебей тургандыктары аныкталды.

Мындан сырткары, КР Транспорт жана коммуникациялар министрлигинин жерде жүрүүчү жана суу транспорту департаментинин Ош аймактык башкармалыгынын башчысы Бакай Жолдошбаев менен “ГазпромКыргызстан” ЖЧКсынын “ОшГаз” филиалынын жетекчисинин орун басары Мирбек Маматовторго карата чара көрүү боюнча аталган мекемелерге Ош шаарынын мэриясы тарабынан сунуштар жиберилди.

Буга чейин Ош шаарынын мэриясынын түзүмдүк жана аймактык бөлүмдөрүнүн кызматкерлери жана жетекчилери КР ЖК депутаттарын шайлоо өнөктүгүнө аралашпоо боюнча Ош шаарынын мэри Бакытбек Жетигенов аппараттык жана коллегиялык отурумдарда бир канча жолу эскерткен. Андан сырткары мамлекеттик жана муниципалдык мекеме-ишканаларга кат да жиберилип маалымдалган.